Profili i Bashkisë Rrogozhine
Bashkia Rrogozhinës shtrihet në një terren pjesërisht kodrinor dhe pjesërisht fushor deri në bregun e detit. Bashkia ka për qendër qytetin e Rrogozhinës, i cili u krijua në kohën e komunizmit përreth agroindustrisë, si fabrika e vajit dhe sapunit apo ajo e zhveshjes së pambukut, si dhe një linjë për përpunimin dhe konservimin e ushqimeve. Kjo industri tashmë është mbyllur prej kohësh. Qyteti i Rrogozhinës zë rreth një të tretën e të gjithë popullsisë banuese të bashkisë së re.
Ekonomia e Bashkisë eshte fokusuar ne dy shtylla kryesore ne bujqesi ku 70% e territorit eshte bujqesore dhe turizem ku disponon 20 kilometer vije bregdetare. Hartimi i planeve të duhura zhvillimore, të shoqëruara me investimet e përshtatshme për rrugë, kanalizime, ndriçim dhe ujë të pijshëm ofron një mundësi për rritjen e të ardhurave të bashkisë.
Zona Gjeografike:
Kjo bashki përbëhet nga 5 njësi administrative, të cilat janë: Rrogozhinë, Kryevidh, Sinaballaj, Lekaj dhe Gosë. Të gjitha njësitë administrative janë aktualisht pjesë e rrethit të Kavajës dhe qarkut të Tiranës. Bashkia e re ka nën administrimin e saj një qytet dhe 36 fshatra.
Popullsia:Bashkia e re numëron 22,148 banorë, ndërsa sipas Regjistrit Civil ajo numëron një popullsi prej 40,684 banorë. Bashkia e re ka një sipërfaqe prej 223.5 km2. Sipas regjistrit civil, densiteti i popullsisë është 182 banorë/km2, ndërsa sipas censusit, densiteti është 99 banorë/km2.
Rrogozhina kufizohet në veri me Bashkinë Kavajë, në veri-lindje me Bashkinë Tiranë, në jug me Bashkinë Lushnje dhe Divjak, në lindje me Bashkinë Peqin dhe në perëndim me Detin Adriatik. Kryeqendra e Bashkisë është qyteti i Rrogozhinës.
Historia e Qytetit Rrogozhinë:
Qyteti i Rrogozhinës i njohur në literaturën arkeologjike dhe historike me emrin “ASPARGAIUM”, përmendet si një vendbanim i lashtë dhe udhëkryq i rëndësishëm gjeografik dhe historik. Aspargaium ndodhej në kryqëzimin e dy segmenteve të rrugës “Egnatia”, të cilat vinin nga Apollonia dhe Dyrrakium në drejtim të Romës dhe Kostandinopojës. Rrogozhina, përveçse nyje e rëndësishme tregtare dhe gjeografike, mbart mbi vete kultura, tradita, rite, zakone dhe veçori gjuhësore midis Shqipërisë se Mesme dhe asaj të Jugut.
Rrogozhina e sotme, e pozicionuar midis Durrësit, Lushnjës dhe Elbasanit, është nyje e rëndësishme e korridorit të 8-të, dhe e kryqëzimit hekurudhor Rrogozhinë-Durrës, Rrogozhinë-Vlorë dhe Rrogozhinë – Pogradec. Midis viteve 1960-1990, qyteti i Rrogozhinës kishte disa prej fabrikave më të rëndësishme të prodhimit, si ajo e vaj-sapunit ku prodhohej vaji i lulediellit dhe ku kishte linjë të përpunim-konservimit të ushqimeve, midis së cilave edhe një fabrikë makaronash. Uzina e zhveshjes së pambukut, ku vinte pothuaj i gjithë prodhimi vendas i pambukut, si edhe punishtja e përpunimit të bimëve mjekësore dhe etero-vajore e renditën qytetin përsëri krah qyteteve të tjera të rëndësishme të industrisë së lehtë dhe prodhimit ekonomik.
